CALENDARIO 2026

As viaxes de Arnaldo é o proxecto deste ano. 

 

Todo o cole viaxaremos para coñecer diferentes culturas, idiomas, gastronomía... e no calendario de 2026 tendes algunhas pistas dos nosos destinos. Acompañádesnos nesta viaxe?

CALENDARIO 2025

Argallando ando é o proxecto no que estamos metidos este curso no que estreamos o Argalladoiro, unha aula na que podemos cociñar, facer experimentos, construcións... é dicir: argallar!!

Cada clase encargouse de ilustrar un mes con algo relacionado coa ciencia... non perdades detalle!

Algúns xa o están espremendo nas aulas e outros levarano para casa con algúns consellos para sacarlle partido: poñédeo nun lugar especial que seguro que lles fai ilusión!!

CALENDARIO 2024

 Este ano, o proxecto do cole chamámolo SEIXO CHEO DE VIDA porque queremos coñecer a fauna e a flora de Seixo, coidar o mundo e darnos conta que hai moito que podemos facer aínda que sexamos pequenos. 

Cada clase encargouse de ilustrar un mes con debuxos sobre a "vida" en Seixo (que tamén forman parte do novo mural pintado no colexio) e sobre o que nos pode axudar a coidar do noso planeta, mirádeos con atención que seguro que descubrides algún coñecido!

Algúns xa o están espremendo nas aulas e outros levarano para casa con algúns consellos para sacarlle partido: poñédeo nun lugar especial que seguro que lles fai ilusión!!

CALENDARIO 2023

Este ano, o proxecto do cole chamámolo RqueR porque queremos coñecer diferentes erres que nos axuden a coidar o mundo e darnos conta que hai moito que podemos facer aínda que sexamos pequenos. 

Cada clase encargouse de ilustrar un mes cunha R que nos pode axudar a coidar o noso planeta, mirádeas con atención que seguro que descubrides algunha!

Algúns xa o están espremendo nas aulas e outros levarano para casa con algúns consellos para sacarlle partido: poñédeo nun lugar especial que seguro que lles fai ilusión!!

CALENDARIO 2022

Este curso estamos de 50º aniversario no CEIP de Seixo (do 1972-2022). Fai 50 anos que diferentes escolas unitarias das parroquias desta zona do concello de Marín, unificáronse coa creación do CEIP de Seixo. A súa primeira directora foi Mercedes Portas.

Por iso pensamos que o tema ideal para o PDI deste curso xirase sobre diferentes aspectos relacionados coa escola e sociedade dende 1972 ata agora, e ese é o tema do calendario de 2022 que quedou moi chulo, verdade?.

Cada clase encargouse de ilustrar un mes co tema elixido para traballar na súa aula. Estade atentos porque pronto saberedes máis da historia de cada unha das páxinas do calendario.

O alumnado e as aulas xa teñen o seu calendario: felices e emocionados de ver o resultado do seu traballo!!

Algúns xa o están espremendo nas aulas e outros levarano para casa con algúns consellos para sacarlle partido: poñédeo nun lugar especial que seguro que lles fai ilusión!!

CALENDARIO 2021

Aínda que 2021 se presenta como un ano diferente, non podíamos deixar de facer o calendario do cole que nos acompañará durante 365 días e no que esperamos ir apuntando cada día mellores novas.

Este curso non deixaremos as máscaras, nin o lavado de mans... escoitaremos falar seguido de vacinas, dos sanitarios... e tamén pensaremos na saúde emocional e nas formas en que podemos levar mellor este momento.

Por iso pensamos que o tema ideal para o PDI deste curso é a saúde, e ese é o tema do calendario de 2021 que quedou moi chulo, verdade?.

Cada clase encargouse de ilustrar un mes co tema elixido para traballar na súa aula.

Mirade aos nenos e nenas de 4º que xa desfrutaron vendo as obras de arte de todos os compis

 

Algunhas clases traballarán con eles no cole, pero outros levárono para casa. Agardamos que sexan prácticos e útiles no día a día... xa nos contaredes: desexamos que vos gusten!!

CALENDARIO 2020

Un ano máis, e recén cociñado, presentámosvos o calendario deste ano 2020 que xa está en marcha. 

Durante este curso quixemos seguir investigando e afondando, un pouquiño máis, no PDI que comezamos o curso pasado. 

Por iso seguimos traballando en...

OS RECUNCHOS DO NOSO COLE

Cada clase encargouse de ilustrar un mes co recuncho do cole elixido na súa aula.

   

Entre todos seguiremos traballando diferentes aspectos que contribúan a que o patio do noso cole sexa un lugar mellor. 

Desexamos que vos guste!

CALENDARIO 2019

Por fin saíu do forno o calendario deste ano 2019 que xa está en marcha. 

Durante este curso estamos traballando e investigando O PATIO QUE SOÑAMOS. 

Cada clase encargouse de ilustrar un mes co tema do proxecto elixido na súa aula. Entre todos traballamos diferentes aspectos que contribúen a que o patio do noso cole sexa un lugar mellor. 

Desexamos que vos guste.

CALENDARIO 2018

A semana pasada, as familias do alumnado de primaria, recibistes en casa o calendario máis bonito do mundo mundial (os de infantil traballarano na aula). 

Dicímolo con orgullo e satisfacción vendo o bonito que quedou e o ben que resume o proxecto deste ano do cole: EXPLORANDO NA CASA DE ARNALDO. 

Arnaldo vive na biblioteca, e durante este curso queremos que todo o alumnado e as familias coñezades os recursos que a biblio ofrece para o traballo diario na aula, e que tamén tendes á vosa disposición.

Os 12 meses reflexan recursos e ferramentas que Arnaldo pon á nosa disposición e que nos axudan a facer do proceso de ensinanza aprendizaxe algo máis proveitoso e divertido.

Non deixedes de visitarnos os martes e xoves pola tarde (de 16:30 a 18:30) e preguntarnos todas as dúbidas e curiosidades que teñades. 

A biblioteca é de todos e para todos, e encantaranos que veñades a facer préstamo de libros (incluida a biblioteca de adultos), xogar en familia cos xogos de mesa, etc...

CALENDARIO ANO 2017

Por fin saíu do forno o calendario deste ano 2017 que xa está en marcha. Durante este curso estamos traballando e investigando O MUNDO QUE QUEREMOS.

Cada clase encargouse de ilustrar un mes co tema do proxecto elixido na súa aula. Entre todos traballamos diferentes aspectos que contribúen a que o mundo sexa un lugar mellor. 

Desexamos que vos guste.

Cada clase ten un calendario, e ademais todo o alumnado terá unha copia. 

Algúns traballarán na aula cos calendarios individuais, pero outros mandaranos para casa. 

Aquí vos deixamos algunhas suxerencias por si queredes sacarlle o máximo partido... e se tendes máis ideas: encantaríanos coñecelas!

 

CALENDARIO 2016

FELIZ 2016! Este ano estamos investigando a fondo O NOSO CONTORNO por iso cada clase ilustrou un mes co proyecto de aula que elixiron para investigar e aprender moito sobre Seixo: os ríos, os petróglifos, os animais, as árbores, o mercado, as costumes e tradicións, os cruceiros... imos aprender un montón!!!

Aquí o tedes, pinchade enriba para velo en grande... desexamos que vos guste!

CALENDARIO: ANO DO MAR EN SEIXO

FELIZ 2015 A TODOS!!

Que mellor forma de comezar 2015 que co novo calendario do cole? Este ano está adicado ao mar, e cada clase ilustrou un mes cun tema especial por ser parte da sua investigación.

Aquí o tedes, pinchade enriba para velo en grande... desexamos que vos guste! 

Tamén lle daremos aos nenos que leven o calendario para casa unhas recomendacións para sacarlle partido.